کوئٹہ:سرینا ہوٹل کے قریب دھماکہ، متعدد افراد جاں بحق، کئی افراد زخمی

کوئٹہ کے سرینا ہوٹل کے قریب دھماکہ، متعدد افراد جاں بحق، نجی ہوٹل کی پارکنگ میں ہوئے دھماکے کے بعد قریبی عمارتوں کے شیشے ٹوٹ گئے، کئی افراد زخمی، ہسپتالوں میں ایمرجنسی نافذ۔ تفصیلات کے مطابق بلوچستان کے دارالحکومت کوئٹہ کے مصروف علاقے میں دھماکہ ہوا ہے۔ میڈیا رپورٹس کے مطابق دھماکہ کوئٹہ کے علاقے جناح روڈ پر ہوا۔
ترجمان بلوچستان حکومت لیاقت شاہوانی کی جانب سے بتایا گیا ہے کہ دھماکہ کوئٹہ کے واحد فائیو اسٹار ہوٹل سیرینا کے پارکنگ میں ہوا۔ اس ہوٹل میں وی آئی پی شخصیات، غیر ملکی مہمان قیام کرتے ہیں۔ دھماکہ سیرینا ہوٹل کی پارکنگ میں ہوا جس کے نتیجے میں کئی گاڑیوں تباہ ہو گئیں اور آس پاس کی عمارتوں کے شیشے ٹوٹ گئے۔ دھماکے کی آواز دور دراز کے علاقوں میں بھی سنی گئی۔

دھماکے کے نتیجے میں آخری اطلاعات تک 4 افراد شہید جبکہ متعدد افراد زخمی ہوگئے۔ دھماکے کے بعد امدادی ٹیمیں جائے وقوعہ پر پہنچ کر امدادی کاروائیوں میں مصروف ہیں۔ زخمی افراد کو فوری ہسپتال منتقل کیا جا رہا ہے، جبکہ سیکورٹی فورسز نے بھی علاقے کو گھیرے میں لے لیا ہے۔ واقعے کے بعد کوئٹہ کے ہسپتالوں میں ایمرجنسی نافذ کر دی گئی ہے۔ واقعے کے حوالے سے وزیر داخلہ شیخ رشید احمد کی جانب سے بتایا گیا ہے کہ ابتدائی اطلاعات کے مطابق یہ دہشت گردی کا واقعہ ہے، واقعے کی ابتدائی تحقیقاتی رپورٹ 2 سے 3 گھنٹوں میں سامنے آ جائے گی۔
وزیر داخلہ کا کہنا ہے دشمن پاکستان کیخلاف سازشیں کرنے میں مصروف ہے، منصوبہ بندی کے تحت دہشت گردی کی لہر آ رہی ہے۔ دیگر شہروں میں بھی دہشت گردی کے واقعات ہو سکتے ہیں، اسلام آباد، کراچی، لاہور اور راولپنڈی میں دہشت گردی کے تھریٹ موجود ہیں، کراچی میں کچھ دہشت گرد پکڑے بھی گئے ہیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے